Lelagon
Jamuran yo gé … gé … thok .
Jamur apa ya gé … gé … thok.
Jamur gajih, mbrejijih sak ara-ara.
Sira mbadhé jamur apa ?
Wiraganipun
Laré-laré sami ngadeg kekantèn tepung
gelang gegandhèngan asta , ingkang dados manggèn ing tengah-tengah . Dolanan
dipun wiwiti kanthi tetembangan kalian mubeng menengen , Dumugi “sira mbadhé
jamur apa” sami kèndel anggènipun mlampah. Ingkang dados kantun milih
jamur ingkang dipun remeni. Upaminipun
jamur “Lot Kayu” laré-laré sami cepengan
utawi ngrangkul wit-witan utawi saka utawi sanèsipun. Ingkang dados nyobi
nguwalaken saking cepengan punika, menawi saged uwal, ingkang uwal punika
nggentosi dados, ananging menawi mboten saged uwal , dados malih. Tumunten
dolanan dipun wangsuli saking ngajeng.
Katrangan
Jamur ingkang biasanipun dipun pilih
:
- Jamur lot kayu
laré-laré sami cepengan utawi ngrangkul wit-witan utawi saka
utawi sanèsipun. Ingkang dados nyobi nguwalaken saking cepengan punika, menawi
saged uwal, ingkang uwal punika nggentosi dados, ananging menawi mboten saged
uwal , dados malih. Tumunten dolanan dipun wangsuli saking ngajeng.
- Jamur tunggak kayu
Laré-laré sami ndhodhok kalian cepengan punapakémawon supados
kiat. Ingkang dados nyobi njunjung, ingkang saged dipun junjung gentosan dados.
- Jamur lot uwong
Laré-lare sami pados kanca piyambak-piyambak kalih utawi
tiga, rangkulan utawi cepengan bangkèkan kenceng. Ingkang dados nyobi
nguwalaken , menawi saged ingkang uwal gentos dados. Menawi boten saged uwal,
dados malih tumunten dolanan dipun wangsuli saking ngajeng.
- Jamur Emprit Mabur
Laré-laré sami mlajar pating slebar , ingkang dados ngoyak .
ingkang dipunoyak ndhodhok, boten kénging ngantos kecepeng. Menawi dèrèng
ndhodhok sampun saged kecepeng , ingkang kecepeng dados.
- Jamur emprit mencok
Laré-laré sami ndhodhok pating slebar (kosok wangsulipun
jamur emprit mabur) ingkang dados usaha nyepeng . Menawi badhé dipun cepeng
kedah ngadek/mlajar/mabur. Menawi dèrèng ngadeg saged kecepeng , ingkang
kecepeng dados.
No comments:
Post a Comment